Ca trike në Internet Explorer 7

Motori i kërkimit të Internet Explorer 7 nuk limitohet më vetëm te motori i Microsoft-it. Tani mund të përdorni Google, Yahoo, eBay, Wikipedia dhe shumë të tjerë. Klikoni te shigjeta kokëposhtë që ka si etiketë Search Options (opcionet e kërkimit), e cila ndodhet në të djathtë të shiritit të kërkimit, përkrah lupës. Klikoni, në mënyrë që të shfaqen motorë të tjerë, dhe pastaj zgjidhni ata që dëshironi. Kur duhet të kryeni një kërkim, shkruani fjalët kyçe dhe klikoni te Search Options për të zgjedhur motorin e dëshiruar nga lista që keni krijuar vetë.


Shfletuesi Internet Explorer 7 përmban suportin për RSS. Nëse vizitoni rregullisht faqe lajmesh apo blogje, do t’ju hyjë shumë në punë lexuesi RSS i IE7. Ndërkohë që jeni duke lundruar në faqe të tilla, kërkoni ikonën portokalli të RSS dhe klikoni mbi të. Si rezultat do t’ju shfaqet materiali i faqes dhe një opcion për t’u regjistruar. Për të parë regjistrimet që keni bërë, shtypni Ctrl + Shift + J nga tastiera. Kjo bën që të hapet Favorites Center (Qendra e Preferencave) e IE7. Klikoni mbi njërin nga emrat, për të parë postimet më të fundit nga ajo faqe.






Kokëccarja më e madhe që iu ka sjellë shfletimi me tabe ish-përdoruesve të IE6 është fakti se nuk mund të kalojnë nga njëri tab në tjetrin nëpërmjet të famshmes ALT + Tab. Por mos e vrisni mendjen, pasi Microsoft e ka mbajtur parasysh këtë gjatë zhvillimit të IE7. ALT + Tab mund të përdorni ende për të kërcyer nga njëra dritare në tjetrën, por nëse dëshironi të shfletoni tabet brenda së njëjtës dritare shtypni në tastierë Ctrl + Tab. Ndoshta do ta keni paksa të vështirë në fillim, se do t’ju duhet ta çoni gishtin e madh deri në fund të tastierës, por me kalimin e kohës veprimi bëhet më i lehtë.


Ju ka ndodhur ndonjëherë ta mbyllni IE7 me lot në sy, për shkak se janë mbyllur gjithë tabet dhe do t’ju duhet t’i hapni sërish tek e tek nga e para? Jepini fund dhimbjes, duke shkarkuar këtë shtojcë në adresën http://www.windowsmarketplace.com/details.aspx?view=info&itemid=3343000 . Tani do të keni mundësi t’i ruani sesionet në një skedar dhe, madje, edhe t’ia dërgoni vetes me anë të postës elektronike, nëse dëshironi ta merrni punën në shtëpi për shembull. Pasi ta keni instaluar shtojcën, shkoni te Tools/IE Sessions dhe, pasi ta keni ruajtur, përdorni opcionin Import/Export nëse dëshironi.


Shumë njerëz e kanë problem kur nuk shohin shiritin e menysë te IE7. Për ta aktivizuar përkohësisht, shtypni ALT. Për ta aktivizuar njëherë e mirë, shkoni te Tools/Menu Bar. Por edhe pasi ta keni bërë këtë, duket sikur diçka nuk shkon. Në versionet e mëparshme të IE-së, shiriti i menysë ishte poshtë shiritit të adresave, ndërkohë që tani është mbi të. Këtë mund ta ndreqni me anë të një trukimi të vogël të Regjistrit. Shkoni te Start\Run dhe shkruani regedit (në Vista shkruani regedit te shiriti i kërkimit). Shkoni te HKEY_CURRENT_USER\Software\Microsoft\Internet Explorer\Toolbar\WebBrowser. Zgjidhni Edit\New\DWORD Value. Riemërtojeni vlerën e re DWORD duke shkruar ITBar7Position, në vend të New Value #1. Tani shndërrojeni në 1 shifrën 0 që gjendet në kllapa, duke klikuar me të djathtën mbi ITBar7Position dhe duke zgjedhur Modify. Mbylleni Regjistrin dhe rihapeni IE7.





Shtojcat për shfletuesit janë si thika me dy presa, sepse përveç të mirave që kanë, shkaktojnë edhe ngadalësim apo përplasje të sistemit. Për të menaxhuar shtojcat, shkoni te Tools\ Manage Add-Ons\Enable or Disable Add-Ons. Për ta çaktivizuar/aktivizuar ndonjë prej tyre, thjesht klikoni mbi të dhe pastaj zgjidhni Enable (Aktivizo), Disable (Çaktivizo) ose Delete, nëse doni ta fshini fare. Nëse shfletuesi herë pas here ju mbyllet befasisht, kjo është një mënyrë e mirë për të kuptuar shkakun. Aktivizojini dhe çaktivizojini me radhë shtojcat, derisa ta kuptoni se cila prej tyre është “non-grata”.


Ndryshimi i kuadrit standard, përsa i përket fontit dhe ngjyrës, zakonisht bëhet për të lehtësuar aksesimin e faqeve, por nëse dëshironi që të gjitha faqet që hapni të shfaqen me të njëjtin lloj fonti, ja se si mund ta bëni: Shkoni te Tools\Internet Options hapni tabin General (të përgjithshme) dhe zgjidhni Accessibility.Zgjidhni opcionet Ignore colors specified on webpages (Shpërfill ngjyrat e specifikuara në faqet ueb), Ignore font styles specified on webpages (Shpërfill stilet e fonteve të specifikuara në faqet ueb), dhe Ignore font sizes specified on webpages (Shpërfill përmasat e fonteve të specifikuara në faqet ueb). Pastaj klikoni butonat Fonts dhe Colors te tabi General dhe zgjidhni cilët të dëshironi.