55 Sekrete për një kompjuter më të sigurtë (Part 1)

Kapja e pamjes së ekranit me Snipping Tool































Lërjani viteve ‘80 butonin Print Screen, pasi atje e ka vendin. Te dosja Accessories, në menynë Start, do të gjeni Snipping Tool të Vista-s, e cila ju mundëson të kapni pamjen e vetëm asaj pjese të ekranit që dëshironi. Aktivizojeni, klikojeni me anë të miut dhe pastaj tërhiqeni për të përcaktuar zonën që doni të ruani. Pas kësaj mund edhe ta modifikoni imazhin duke vizatuar mbi të, duke nënvizuar apo duke fshirë pjesë të veçanta dhe, në fund, mund ta ruani në një skedar.



Koherencë me cilëndo pikë të globit
















Nëse udhëtoni vazhdimisht apo keni pjesëtarë të familjes a shokë në zona të tjera kohore, mund ta konfiguroni Vista-n në mënyrë të tillë që të shfaqë disa orë njëkohësisht. Klikoni mbi orën në tabakanë e sistemit, pastaj zgjidhni “Change date and time settings…” dhe hapni tabin Additional Clocks. Klikoni mbi kutizën përbri “Show this clock” për çdo orë shtesë që dëshironi të shtoni, pastaj specifikoni zonën kohore dhe emërtoni secilën orë. Pasi t’i konfirmoni ndryshimet duke klikuar OK, sa herë që të klikoni mbi orën në tabakanë e sistemit do të shfaqen orët për çdo zonë kohore që keni zgjedhur.



Përmirësoni hapjen e programeve përmes Quick Launch


















Menyja Quick Launch nuk vlerësohet aq sa duhet, por është një mënyrë fantastike për të hapur më shpejt aplikacionet tuaja më të zakonshme. Nëse nuk arrini ta shihni menynë, klikoni me të djathtën të shiriti i detyarve dhe zgjidhni Toolbars, klikoni mbi Quick Launch për ta shtuar atë dhe pastaj tërhiqini programet apo shkurtoret në të. Tani mund t’i hapni programet në çast, thjesht dhe vetëm duke klikuar mbi ta, ose, më mirë akoma, duke përdorur tastin Windows. Tasti Windows + 1 hap programin që ndodhet më majtas, Windows + 2 atë që ndodhet përkrah tij, e kështu me radhë, deri te ikona e dhjetë që hapet duke shtypur Windows + 0.



Konfigurim i personalizuar me Windows Mobility Center
























Të na falni ju përdorues të desktopit, por kjo vlen vetëm për përdoruesit e laptopëve. Windows Mobility Center, të cilën mund ta hapni duke shtypur tastin Windows + X, ju jep mundësinë të trukoni të gjithë konfigurimet e laptopit në një vend të vetëm. Këtu mund të ndryshoni ndriçimin e ekranit, të rregulloni zërin, të kontrolloni gjendjen e baterisë, të çaktivizoni lidhjen pa tel, të ndryshoni orientimin e ekranit dhe shumë e shumë çiçivele të tjera.



Gjeni gjithçka me anë të Kërkimit të Çastit
S’keni pse hapni një dritare të veçantë për të gjetur skedarët apo programet që ju duhen. Thjesht shtypni tastin Windows, ose klikoni mbi butonin Start, dhe filloni të shkruani. Vista do t’ju shfaqë një listë të organizuar të skedarëve dhe programeve kryesorë që përputhen me kriterin tuaj të kërkimit. (Nëse doni të shihni të gjitha rezultatet e gjetura, klikoni mbi linkun “See all results” në pjesën fundore të dritares së Instant Search-it).





Fusni më shumë ikona në desktop

Nëse e keni ekranin të mbuluar nga dokumentet Word dhe shkurtore programesh që s’ju lejojnë të shihni livadhin e sfondit, s’keni pse i hidhni të gjitha në koshin e plehrave, por mjafton të ndryshoni hapësirën midis ikonave. Klikoni me butonin e djathtë të miut mbi desktop dhe zgjidhni Properties, pastaj hapni tabin Appearance dhe klikoni butonin Advanced. Te lista vertikale që ndodhet nën diçiturën “Item”, shkoni te Icon Spacing (Horizontal) dhe Icon Spacing (Vertical) dhe ndryshoni vlerat e fushës “Size”. Ulja graduale e shifrave i afron ikonat me njëra-tjetrën. Pasi të keni përfunduar, klikoni OK. Në mënyrë që ikonat ekzistuese t’i nënshtrohen këtyre rregullave, klikoni me të djathtën mbi desktop, zgjidhni “Arrange Icons By” dhe pastaj klikoni mbi Align to Grid. Me të bërë këtë, kthehuni sërish te e njëjta meny dhe klikoni “Auto Arrange”.



Fikeni kompjuterin nga desktopi

Nëse ju kanë ardhur në majë të hundës gjithë ato klikime të miut që duhen për të fikur kompjuterin, atëherë ndoshta ka ardhur momenti të shtoni një ikonë në desktop, që i thjeshton gjërat në maksimum. Klikoni me butonin e djathtë mbi desktop, klikoni New dhe pastaj Shortcut. Te fusha “Type the location of the item”, shkruani “shtudown –s –t 00”, në mënyrë që ta fikni kompjuterin menjëherë. (Për të krijuar një shkurtore që e rindez kompjuterin, në vend të –s shkruani –r).



Pakësoni programet që hapen gjatë ndezjes
























Mund të parandaloni një numër të madh aplikacionesh që i bëjnë zbor Windows-it gjatë ndezjes, pa qenë e nevojshme që të çinstaloni çfarëdoqoftë. Klikoni mbi butonin Start, zgjidhni Run dhe shkruani “msconfig”. Si rrjedhojë hapet dritarja e konfigurimit të sistemit. Hapni tabin Startup për të parë listën e programeve “të dënuara” për t’u aktivizuar sapo të ndizet kompjuteri. Boshatisni kutizat që ndodhet përbri atyre që nuk i doni dhe klikoni OK për të regjistruar ndryshimet.



Kontrolloni ikonat pasive të tabakasë së sistemit
S’keni pse i fshihni apo t’i shfaqni një e nga një të gjitha ikonat në tabakanë e sistemit (shiriti i programeve ndanë vendit ku tregohet ora), pasi mund t’i programoni që të zhduken automatikisht. Klikoni me të djathtën në shiritin e detyrave dhe zgjidhni Properties. Klikoni mbi kutizën përbri “Hide inactive icons” (gjithmonë nëse është bosh), dhe pastaj klikoni mbi butonin Customize. Për çdo ikonë të listës mund të zgjidhni opcionet “Hide when inactive” (Fshihe kur është pasive), “Always hide”” (Fshihe Përherë) ose “Always show” (Shfaqe Përherë), për të përcaktuar se çfarë do të shihni dhe kur do ta shihni.



Shkruani pa pastierë përmes ekranit
Nëse keni probleme me duart apo preferoni të përdorni miun për të shkruar, mund t’ju vijë në ndihmë tastiera e Windows-it. Shkoni te Start/All Programs/Accessories/Accessibility dhe klikoni “On-Screen Keyboard”. Klikoni OK për të zbrazur dritaren dhe më pas nisni të shkruani. Windows ju lejon ta konfiguroni “tastierën” në mënyrë të tillë që butonat të shtypen vetë, thjesht duke kaluar mbi ta kursorin e miut. Këtë opcion dhe intervalin midis dy karaktereve mund ta aktvizioni duke zgjedhur “Typing Mode” te menyja Settings.