Liderët botërorë vlerësojnë Ahtisaarin

Liderë të ndryshëm botërorë kanë përgëzuar Martti Ahtisaarin për marrjen e Çmimit Nobel për Paqe.
Shefi i diplomacisë evropiane, Javier Solana ka thënë se Ahtisaari e meriton plotësisht këtë çmim, meqë gjatë karrierës së tij, përkushtimi i tij për promovimin e paqes ndërkombëtare, drejtësisë dhe pajtimit kanë qenë i palëkundur.

Berlini zyrtar ka shprehur kënaqësinë me ndarjen e këtij çmimi, duke thënë se meritat kryesore të Ahtisaarit kanë qenë në zgjidhjen konfliktit të Kosovës.

Ministri i Punëve të Jashtme të Francës Bernard Kouchner ka lavdëruar Ahtisaarin për kurajë dhe përkushtim të vendosur në Namibi, Kosovë, Aceh të Indonezisë dhe vatra tjera të krizës.

Në anën tjetër, ish kryeministri serb Vojisllav Koshtunica ka thënë se fakti që Ahtisaari ka marrë çmimin Nobel për Paqe flet se "mentorët e krijimit të shtetit të rrejshëm të Kosovës po bëjnë presion në të gjitha fushat".