Amato: PS do fitojë zgjedhjet me programin e ri

Kreu i Partisë Socialiste, Edi Rama po konsultohet me figura të larta të politikës italiane lidhur me programin e ri të PS-së. Ish-kryeministrat italianë, Masimo D’Alema dhe Giuliano Amato me ekspertët e tyre janë pjesë e rrjetit ndërkombëtar të miqve dhe ekspertëve të nivelit të lartë që po asistojnë Ramën dhe ekipin e programit të ri të Partisë Socialiste.
Gjatë takimit të dytë në selinë prestigjioze te fondacionit “Italian Europei” janë diskutuar draftet e përgatitura nga grupet e përbashkëta të ekspertëve për energjinë, rritjen ekonomike, punësimin, arsimin, shëndetësinë, pensionet dhe bashkëpunimin rajonal.

Disa herë si kryeministër i Italisë, por edhe si njëri prej ekspertëve më të dëgjuar në Evropën e sotme, Amato, në një prononcim për mediat, është shprehur mjaft optimist për këtë bashkëpunim. Por ai vuri në dukje se Shqipëria ndodhet ende para problemeve të mëdha ende të pazgjidhura.

“Shumë gjëra kalojnë përmes administratës, madje edhe shëndeti kalon përmes administratës dhe impresioni që e vetmja mënyre për të mbaruar punë është t’i japësh diçka dikujt apo që duhet të jesh mik i dikujt, është gjëja e parë që duhet ndryshuar. Ana tjetër që duhet ndryshuar është një aspekt fizik i saj (Shqipërisë). Shqipëria është një vend që ka përpara saj një zhvillim të madh, por nuk ka energjinë për të bërë gjërat që duhen bërë”, vuri në dukej ai duke përmendur në këtë spektër edhe bujqësinë.

Gjithsesi Amato nënvizoi se programi i ri i PS “do të sjellë pikërisht një administratë që funksionon, që nuk bën dallimin mes qytetarëve që nuk i njeh dhe që i trajton të gjithë në të njëjtën mënyrë të njohur nga ligji”.

I pyetur rreth figurës së Edi Ramës, eksperti italian e cilësoi atë si një njeri shumë të zot por që duhet të kërkojë më shumë për vizionet rreth së ardhmes. “Është shumë i zoti. Por unë do t’i thosha, që për të fituar zgjedhjet duhet t’i kushtojë shumë nga vetja e tij vizionit, pasi zgjedhjet fitohen përmes vizionit”.

Amato uroi PS të fitojë zgjedhjet që të mund t’u japë zgjidhje probleme që vuri në dukje dhe në takimin me Ramën